“Bu qələbə gələcək oyunlar üçün açar oldu”

Danimarka yığması ilə keçirilən yoldaşlıq oyunlarından sonra futzal üzrə Azərbaycan millisinin üzvü Fərid Abbasov fikirlərini bölüşüb.

Sport1.az xəbər verir ki, oyunçu Futzal Federasiyasının mətbuat xidmətinə açıqlamasında bunları deyib:

“Əvvəlcə bizi dəstəkləmək üçün arenaya gələn azarkeşlərimizə təşəkkür edirəm. İki fərli oyun oldu. Birinci görüşdə səhvlərimiz həlledici oldu və rəqib bundan maksimum yararlandı. Yekunda məğlub olduq. Nəzərə alsaq ki, milli 8 aydan çoxdur oyun keçirmir, üstəlik, heyətimizə yeni futzalçılar da cəlb olunub, müəyyən qədər anlaşılandır. Baş məşqçi oyunu analiz etdi, bizə də səhvlərimizi göstərdi və ikinci oyun üçün təlimatlarını verdi. Bacardığımız qədər mübarizə apardıq, sonluq isə bizim üçün əla alındı.

Bir qol vurmağım və məhsuldar ötürmə etməyim verilən tapşırıqları yerinə yetirməyimin nəticəsidir. Baş məşqçi hər zaman məsləhət bilir ki, əgər özünə, oyunçunu keçə biləcəyinə inanırsansa, cəhd elə, fərdi keyfiyyətlərindən istifadə et. Qolun ötürməsi zamanı da gördüm ki, rəqibi keçə bilərəm, sona qədər davam etdim. Bu qələbə gələcək oyunlar üçün açar oldu. Əsas odur ki, özümüzə inanaq və çox çalışaq”.

Qeyd edək ki, yanvarın 22-də Danimarka yığması ilə keçirilən ilk oyunda rəqib 4:1 hesabı ilə qalib gəlib. Yanvarın 24-də baş tutan ikinci matçda isə komandamız 4:2 hesablı qələbə qazanıb.