Emeri Avropa Liqasında bunu bacaran ilk məşqçi oldu

“Aston Villa”nın baş məşqçisi Unai Emeri Avropa Liqasında tarixi göstəriciyə imza atıb.

Sport1.az xəbər verir ki, klubun rəsmi saytının məlumatına görə, ispan mütəxəssis turnirdə 100-cü oyununa çıxıb və bu həddə çatan ilk çalışdırıcı olub.

Emerinin yubiley matçı Avropa Liqasının əsas mərhələsinin 7-ci turunda baş tutub. Yanvarın 22-də İstanbulda keçirilən “Fənərbağça” – “Aston Villa” görüşündə qonaqlar 1:0 hesabı ilə qalib gəlib və 1/8 finala vəsiqəni təmin edib.

Qeyd edək ki, 54 yaşlı mütəxəssis Avropa Liqasını 4 dəfə qazanıb: 3 dəfə “Sevilya” (2013/2014, 2014/2015, 2015/2016), 1 dəfə isə “Vilyarreal”la (2020/2021). Emerinin rəhbərlik etdiyi “Arsenal” 2018/2019 mövsümünün finalında “Çelsi”yə 1:4 hesabı ilə uduzub.