"Bu komandalar elitaya vəsiqəni de-fakto təmin ediblər" - Qəzənfər Abbasov

I Liqanın başa çatmasına 7 həftə qalır.

“Qəbələ” XX turda elitaya vəsiqəni təmin etsə də, çempionluğunu hələ rəsmləşdirməyib. Premyer Liqaya yüksəlməyə əsas namizədlər “Karvan” ilə “İmişli” olsa da, “Baku Sportinq” və “Zaqatala”nın da şansları qalır.

Bundan əlavə, I Liqanın zirzəmisində hazırda “Qaradağ Lökbatan” yer alsa da, “Difai” və “Cəbrayıl” da risk zonasındadırlar.

Görəsən, güclülər dəstəsinə vəsiqəni hansı iki komandanın təmin edəcək? II Liqaya kim düşəcək? Suallarımızı Qəzənfər Abbasova ünvanladıq. Mütəxəssis Sport1.az-a bunları söylədi:

“Qəbələ” şübhəsiz çempiondur. Fürsətdən istifadə edərək elitaya vəsiqəni təmin etdikləri üçün onları təbrik edirəm. Premyer Liqaya çıxmaq uğrunda mübarizə aparan “Karvan” ilə “İmişli”nin də şansları digərlərində çoxdur. İnanmıram ki, onlardan hansısa biri üçüncü pillədən aşağı düşsün. Odur ki, böyük ölçüdə bu komandalar da elitaya vəsiqəni de-fakto təmin ediblər. Sadəcə rəsmləşdirmələri qalıb. “Baku Sportinq” ilə “Zaqatala” nə qədər əzmkarlıq sərgiləyib, uğurlu nəticələr qazansalar da, onlardan heç biri mükafatçılar sırasına düşməyəcək. I Liqada qalmaq uğrunda mübarizəyə gəlincə, hazırda ikinci “5-lik” komandalarının hər birini II Liqaya yuvarlanmaq təhlükəsi var. Təbii ki, “Qaradağ Lökbatan”, “Cəbrayıl” və “Difai”nin vəziyyəti daha ağırdır. Qarşıda hələ 7 tur var. Bu müddət ərzində hər bir komanda üçün finala bərabər oyunlar olacaq. Hansı komandanın çempionatla vidalaşacağını demək çox çətin, hətta mümkünsüzdür. “Qaradağ Lökbatan” I liqadan düşəcəyinə inanmıram. Onların heyətində həm təcrübəli və yaxşı oyunçular var, həm meydanda əzmkarlıqla vuruşurlar. Düzdür, son oyunda onlara texniki məğlubiyyət verilsə də, hər halda rəqibləri ilə xal fərqləri böyük deyil. Onu əritməyə fokuslanacaqlar”.