“Real”da Klopp dövrü: Müdafiə və hücum xəttində yenilənmə planı

Almaniyalı mütəxəssis Yurgen Klopp Madrid “Real”ını çalışdıracağı təqdirdə komandada ciddi dəyişikliklər istəyəcək.

Sport1.az xəbər verir ki, bu barədə “TEAMtalk” nəşri məlumat yayıb. 58 yaşlı məşqçi “kral klubu”nun heyətinin bir neçə mövqedə gücləndirilməsini vacib sayır.

Klopp ilk növbədə iki yeni mərkəz müdafiəçisinin transferini istəyir. Namizədlər sırasında “Bavariya”nın üzvü Dayot Upamekano yer alır. Mütəxəssis “Kristal Pelas”ın futbolçusu Mark Gehi ilə də maraqlanıb, lakin ingilis müdafiəçi “Mançester Siti”yə keçməyə yaxındır.

Bundan başqa, Klopp sol cinah müdafiəçisi mövqeyində də güclənməyə ehtiyac olduğunu düşünür və bu mövqe üçün “Bornmut”dan Aleks Ximenesi nəzərdən keçirir. Alman çalışdırıcı mərkəz yarımmüdafiəyə də yeni oyunçu cəlb olunmasını istəyir. Onun siyahısında “Nyukasl”dan Bruno Gimaraynş və “Ştutqart”dan Anqelo Ştiller var.

Sağ cinah hücumçusu mövqeyində də yenilənmə planlaşdıran Kloppun alternativlərindən biri Dortmund “Borussiya”sının futbolçusu Kərim Adeyemidir.

Qeyd edək ki, daha əvvəl yayılan xəbərlərdə Yurgen Kloppun növbəti mövsümdən etibarən “Real”ın baş məşqçi postuna əsas namizədlərdən biri olduğu bildirilirdi.