Rafinya “Real”la oyunda ağrılarla oynayıb

“Barselona”nın hücumçusu Rafinya İspaniya Super kubokunun finalında “Real”a qarşı oyunu zədə ağrıları ilə keçirib.

Sport1.az xəbər verir ki, “Sport.es” nəşrinin məlumatına görə, braziliyalı futbolçu sol ayağının bud nahiyəsində narahatlıq hiss etsə də, həlledici görüşdə meydana çıxıb. Ağrılar yanvarın 3-də La Liqada “Espanyol”la matçda ortaya çıxıb və məhz bu səbəbdən Rafinya həmin oyunda 64-cü dəqiqədə əvəzlənmişdi.

Buna baxmayaraq, 29 yaşlı hücumçu Super kubokda komandasına kömək edib. O, turnirin yarımfinal və final oyunlarında ümumilikdə dörd qol vuraraq diqqət mərkəzinə düşüb.

Qeyd edək ki, Rafinya 2025/26 mövsümündə “Barselona” forması ilə 17 matça çıxıb, 11 qol və 4 məhsuldar ötürmə ilə yadda qalıb.