Simeone Peres və Vinisiusdan üzr istədi
“Atlético”nun baş məşqçisi Dieqo Simeone İspaniya Super kubokunun yarımfinalında baş verən qalmaqalla bağlı “Real” klubunun prezidenti Florentino Peres və futbolçu Vinisius Juniordan üzr istəyib.
Sport1.az xəbər verir ki, derbi zamanı Simeonenin Vinisiusa ünvanladığı ifadələr ciddi müzakirələrə səbəb olub. Qarşılaşma gedişində argentinalı mütəxəssis braziliyalı hücumçunu təxribata çəkməyə çalışıb və bu vəziyyət texniki zonada gərginliyə yol açıb. Hətta epizodlardan birində “Real”ın baş məşqçisi Xabi Alonso müdaxilə edərək Simeoneyə öz futbolçularına fokuslanmağı tövsiyə edib.
Matçdan sonra açıqlama verən Simeone davranışına görə peşman olduğunu bildirib: “Cənab Florentino və Vinisiusdan üzr istəyirəm. Bu cür davranmaq düzgün deyildi və səhv etdiyimi qəbul edirəm. Qalib gələn komanda növbəti mərhələyə layiq idi”.
Qeyd edək ki, sözügedən yarımfinalda “Real” “Atlético”nu 2:1 hesabı ilə məğlub edərək finala yüksəlib. Daha sonra madridlilər həlledici oyunda “Barselona”ya 2:3 hesabı ilə uduzub.
