“Əgər o gəlməsəydi, klubdan ayrılardım” – Rafinya “Barselona”da qalmasının səbəbini açıqladı

“Barselona”nın hücumçusu Rafinya İspaniya Super kubokunun finalından sonra əsas diqqəti baş məşqçi Hansi Flikin roluna yönəldib.

Sport1.az xəbər verir ki, “Real”a qarşı 3:2 hesablı qələbədən sonra danışan braziliyalı futbolçu alman mütəxəssisin komandadakı dəyişikliklərdə həlledici rol oynadığını bildirib: “Ən vacib məqam ikinci hissəyə toparlanmış şəkildə çıxmağımız idi. Biz Hansinin bizdən istədiklərini etdik”.

Rafinya açıq şəkildə etiraf edib ki, Flikin gəlişi onun “Barselona”dakı gələcəyinə birbaşa təsir göstərib: “Əgər Hansi Flik komandaya gəlməsəydi, mən “Barselona”dan ayrılardım. O, hər şeyi dəyişdi və mənə dedi ki, bu komandada vacib futbolçu olacağam. Futbolçu üçün ən önəmlisi də elə budur – güvən”.

Qeyd edək ki, final görüşündə iki qol vuran Rafinya matçın ən yaxşı oyunçusu seçilib. “Barselona” isə bu qələbə ilə İspaniya Super kubokunu ardıcıl ikinci dəfə qazanıb.