“Tottenhem”də baş məşqçi dəyişikliyi gündəmdə
“Tottenhem”də baş məşqçi Tomas Frankın gələcəyi sual altındadır.
Sport1.az xəbər verir ki, “Indykaila”nın X sosial şəbəkəsində yaydığı məlumata əsasən, London klubunun bəzi futbolçuları danimarkalı mütəxəssisin yaxın zamanda istefaya göndərilə biləcəyini düşünür.
“Tottenhem” bu addımı atacağı halda, Tomas Franka təxminən 20 milyon funt sterlinq (23 milyon avro) məbləğində təzminat ödəməli olacaq. Mütəxəssis 2025-ci il iyulun 1-dən etibarən London təmsilçisini çalışdırır və onun klubla müqaviləsi 2028-ci ilin yayına qədər qüvvədədir.
Premyer Liqada 21 turdan sonra “Tottenhem” 27 xalla turnir cədvəlinin 14-cü pilləsində qərarlaşıb. Komanda bu müddətdə 7 qələbə qazanıb, 8 dəfə məğlub olub və 6 görüşdə heç-heçə edib.
Bundan əlavə, London klubu İngiltərə Kubokunun üçüncü mərhələsində “Aston Villa”ya 1:2 hesabı ilə uduzaraq turnirlə erkən vidalaşıb.
