Vinisiusla bağlı mesaj: Alonso azarkeşlərə ümid verdi

“Real”ın baş məşqçisi Xabi Alonso hücumçu Vinisius Juniorun hazırkı durumu ilə bağlı açıqlama verib.

Sport1.az xəbər verir ki, ispan mütəxəssis braziliyalı futbolçunun əhval-ruhiyyəsindən razı qaldığını bildirib. Onun sözlərinə görə, Vinisius özünü rahat və pozitiv hiss edir:

“Onu sevincli və gülümsəyən görürəm. Hamımız üçün yenidən başlamaq faydalı oldu. Sabah meydanda bu enerjini insanlara ötürməliyik. Əgər bu qarşılıqlı alınsa, hər şey yolunda olacaq”.

Xatırladaq ki, dekabrın 20-də “Real”ın “Sevilya” ilə La Liqanın 17-ci turu çərçivəsində keçirdiyi oyunda (2:0) Vinisius azarkeşlər tərəfindən fitə basılmışdı. Həmin görüşdən sonra braziliyalı futbolçunun qolsuz seriyası 17 oyuna çatmışdı.

Qeyd edək ki, Vinisius 2018-ci ildən “Real”ın formasını geyinir. O, 2025/26 mövsümündə bütün turnirlər üzrə 30 matçda 6 qol vurub və 9 məhsuldar ötürmə ilə yadda qalıb.