Mareska səssizcə getdi – “Çelsi”də ayrılığın pərdəarxası detalları ortaya çıxdı

“Çelsi”nin baş məşqçisi Entso Mareska ilə yolların ayrılmasının detalları üzə çıxıb.

Sport1.az xəbər verir ki, “The Athletic” nəşrinin yaydığı məlumata görə, italiyalı mütəxəssis “Bornmut”la 2:2 hesablı heç-heçə ilə başa çatan oyundan sonra komanda ilə faktiki olaraq vidalaşıb. Mareska qarşılaşmadan sonra keçirilən mətbuat konfransında iştirak etməyib, onun əvəzinə assistenti jurnalistlərin qarşısına çıxıb.

Qeyd olunur ki, Mareska matçdan dərhal sonra paltarını dəyişərək stadionu tərk edib və futbolçularla heç bir söhbət aparmayıb. İlk anda səhhəti ilə bağlı problem yaşadığı ehtimal edilsə də, bu məlumat təsdiqini tapmayıb. Klub daxilindəki mənbələr həmin vaxt mütəxəssisin artıq ayrılıq qərarına kökləndiyini bildiriblər.

“Çelsi” rəhbərliyi əvvəlcədən Mareskanın fəaliyyətinə iki illik qiymətləndirmə müddəti ayırmağı planlaşdırsa da, prosesi vaxtından əvvəl dayandırmağa qərar verib. Futbolçular isə oyundan sonra baş verənlərdən xəbərsiz olublar. Yalnız “Stemford Bric”dən evə qayıdarkən vəziyyətlə bağlı şübhələr yaranıb. Bir qədər sonra isə komandaya bərpa məşqinin ləğv edildiyi və iki gün istirahət veriləcəyi barədə məlumat göndərilib.