“Sevilya”nın taleyi Ramosun əlində?

İspaniyalı müdafiəçi Serxio Ramos “Sevilya” klubunu almaq niyyətindədir.

Sport1.az xəbər verir ki, bu barədə COPE radiosu məlumat yayıb. Mənbənin iddiasına görə, 39 yaşlı futbolçu “Sevilya”nı satın almaq istəyən investorlar qrupuna rəhbərlik edir. Ramosun təqdim etdiyi təklif klub tarixində indiyədək daxil olan ən yüksək maliyyə paketi kimi dəyərləndirilir.

Məlumata görə, sövdələşmə baş tutacağı təqdirdə Serxio Ramos “Sevilya”nın prezidenti postuna keçəcək. Təcrübəli müdafiəçi futbolçu kimi də məhz bu klubun yetirməsidir. O, əsas komandanın heyətində 2004–2005-ci illərdə və 2023/24 mövsümündə çıxış edib.

Ramos karyerası ərzində “Real Madrid”, PSJ və Meksikanın “Monterrey” klubunun da formasını geyinib. O, sonuncu klubu 2025-ci ilin dekabr ayının əvvəlində tərk edib.

Qeyd edək ki, Serxio Ramos futbolçu karyerasında 5 dəfə İspaniya çempionu, 2 dəfə Fransa çempionu, 4 dəfə Çempionlar Liqasının qalibi olub. İspaniya millisi ilə isə dünya çempionluğu və iki Avropa çempionluğu qazanıb.