Avropa Cüdo Birliyi Azərbaycanda katanın inkişafını yüksək qiymətləndirdi

Avropa Cüdo Birliyinin rəsmi internet səhifəsində Azərbaycanda katanın inkişafına həsr olunmuş geniş məqalə dərc edilib.

Sport1.az xəbər verir ki, yazıda ölkəmizdə kata istiqamətinin planlı və ardıcıl şəkildə inkişaf etdiyi xüsusi vurğulanıb. Qeyd olunub ki, bu sahədə atılan addımlar təkcə yarışlarla məhdudlaşmır, eyni zamanda kadr hazırlığı və maarifləndirmə tədbirləri ilə də müşayiət olunur.

Məqalədə bu istiqamətdə keçirilən əsas tədbirlərdən bəhs edilib:

“Ötən həftə Azərbaycan ilk Milli Kata Çempionatını keçirib və eyni zamanda ölkənin ilk kata hakimləri lisenziyalaşıb”.

Bildirilib ki, çempionat çərçivəsində Nage-no-kata üzrə kədet, junior və senior yaş qruplarında yarışlar təşkil olunub. Bununla yanaşı, Azərbaycan millisinin EJU Kata Tour-da qazandığı ilk tarixi medal ölkədə katanın beynəlxalq səviyyədə də uğur qazandığını göstərib:

“Azərbaycan komandası EJU Kata Tourda ilk tarixi medalını qazanaraq uğurunu beynəlxalq səviyyədə təsdiqləyib”.

Yazıda həmçinin uşaqlar üçün keçirilən “Kata for All” festivallarına da toxunulub. Qeyd olunub ki, bu layihə gənc nəslin kata mədəniyyəti ilə erkən yaşlardan tanış olmasına imkan yaradır və gələcək üçün möhkəm baza formalaşdırır.

EJU nümayəndələri Azərbaycanın kata sahəsində gördüyü işləri yüksək qiymətləndirib və bu istiqamətdə inkişafın davamlı olacağına inam ifadə ediblər.

“Azərbaycan katanın inkişafında tarixi mərhələni geridə qoyub və bu, yalnız başlanğıcdır”.

Məqalədə, eyni zamanda, federasiyanın kata mədəniyyətinin formalaşdırılmasına verdiyi dəstək və beynəlxalq arenada qazanılan ilk medalın xüsusi əhəmiyyət daşıdığı da diqqətə çatdırılıb.