Füzuli Məmmədov oyun manipulyasiyasında iştirak edib? - ŞOK İDDİA

"Sabah"ın "Neftçi"nin üzvü Elvin Camalovla bağlı bəyanatından xəbərdarsınız.

Masazır təmsilçisi "ağ-qaralar"ın üzvünün "bayquşlar"ın oyunçusuna mövsümün sonunda flaqmana keçmək istədiyini soruşmasını manipulyasiya kimi qiymətləndirir.

Əslində qaydalar necədir? Çıxış etdiyi klubun adından aslı olmayaraq, kiminsə diqtəsi ilə məşq və oyunları baykot etmək, futbolçulara rəqib komandanın baş məşqçisinin, rəhbərliyinin, inzibati heyət üzvünün, futbolçusunun və ya hansısa üçüncü şəxsin görüşə təsir edə biləcək məlumatını çatdırmaq oyun manipulyasiya sayılır. Elvin Camalovun bunu edib-etmədiyini söyləyə bilmərik. Amma ölkə futbolunda belə hadisələrin çox baş verdiyi açıq-aşkar deyə bilərik.

Redaksiyamıza maraqlı məlumat daxil olub. I Liqada da yuxarıda qeyd olunan kimi hadisələr yaşanır. Sən demə, "Mingəçevir"in baş məşqçisi Füzuli Məmmədov "Difai"nin üzvü Ceyhun Muxtarlı vasitəsi ilə komanda yoldaşı Mahir Həsənova xüsusi mesaj çatdırılıb:

"Füzuli müəllimin salamı var. Narahat olma, yayda bizdəsən!"

Bu hadisə I Liqanın 16-cı turunun "Mingəçevir" - "Difai" matçından 1 gün öncə baş verib. Məlumat üçün bildirək ki, "işıqçılar" həmin görüşdə 1:0 hesabı ilə qalib gəliblər.

Məsələdən xəbərdar olan klub rəhbərliyi AFFA-nın müvafiq qurumuna müraciət edib.

Məlumatı dəqiqləşdirmək üçün "Difai"yə müraciət etdik. Klub məsələ ilə bağlı AFFA-ya müraciət olunması faktını təsdiqlədi.

Məsələ ilə bağlı "Mingəçevir"in və Füzuli Məmmədovun mövqeyini işıqlandırmağa hazırıq.