Ruslan Voronsov "Qəbələ"nin bir yox, üç hədəfinin olduğunu düşünür - MÜSAHİBƏ

"Qəbələ"nin üzvü Ruslan Voronsovun Sport1.az-a müsahibəsi...

- I Liqanın 20-ci turunda səfərdə "Baku Sportinq"i 5:0 hesabı ilə darmadağın etdiniz. Böyük hesabla qələbə qazandığınız oyunla bağlı fikirlərin maraqlıdır...
- Güclü rəqibə qarşı oynadıq. Onlarla I dövrədəki oyunda qolsuz bərabərliyə razılaşmışdıq. Bu dəfə də çətin matç oldu. 5 topla qalib gəlsək də, görüş asan keçmədi. Qələbə ilə yanaşı elitaya vəsiqə qazandığımıza görə də çox sevincliyik. Bu münasibətlə bütün “Qəbələ” fanatlarını təbrik edirəm. Onlar bizə dəstəklərini əsirgəmir.

- Premyer Liqaya vəsiqə qazanmaqla minimum hədəfinizə çatdınız. Çempionluq yolunda motivasiyanız aşağı düşməyəcək?
- Qətiyyən! Biz çempion olmağı çox istəyirik. Amma qızıl medallara gedən yolda məğlubiyyətsizlik və maksimum az qol buraxmağa fokuslanmışıq. Belə götürəndə bir yox, üç hədəfimiz var.

- “Qəbələ”nin irəli xətdində ən hərəkətlilərdən olsan da, az qol vurmusan. Qarşıda 7 tur var. Növbəti matçlarda qollar vura biləcəksən?
- Əlbəttə! Hər oyunda qol vurmaq və bombardirlər siyahısında yer almaq istəyərəm. Amma əsas olan tək mənim yox, komandamızın uğurudur.

- Səni elitadakı “Qəbələ”nin heyətində görə biləcəyik?
- (gülür). “Qırmızı-qaralar”ın sıralarında olmaq istəyərəm. Amma bu barədə yekun qərarı baş məşqçimiz verəcək.