“Bu gün çox kobud səhvlərə yol verdik” – “Sumqayıt”ın baş məşqçisi

Azərbaycan Basketbol Liqasının 15-ci turunda “Sumqayıt” “Sərhədçi” ilə matçda məğlub olub.

Sport1.az xəbər verir ki, görüşdən sonra komandanın baş məşqçisi Vadim Kuramşin klubun mətbuat xidmətinə açıqlamasında həm rəqibi təbrik edib, həm də oyundakı çatışmazlıqlara toxunub: “Sərhədçi”ni qələbə münasibətilə təbrik edirəm. Ardıcıl üç qələbədən sonra komanda bir qədər arxayınlaşdı. Bu gün çox kobud səhvlərə yol verdik. Ümid edirəm ki, “Lənkəran”a qarşı keçirəcəyimiz növbəti matçda bu səhvləri təkrarlamayacağıq”.

Mütəxəssis ribaundlarda buraxılan boşluqları da xüsusi vurğulayıb: “Bu gün oyunumuzda ən faciəvi məqam rəqibə 50 ribaund toplamağa imkan verməyimiz oldu. Buna da səbəb mərkəz oyunçumuz Elayca Hatçins-Everettin olduqca zəif çıxışı idi. Belə ucaboy mərkəz oyunçumuz var, amma biz bütün ribaundları uduzuruq. Bu gün onun günü deyildi”.

Qeyd edək ki, “Sərhədçi” “Sumqayıt”ı 98:94 hesabı ilə məğlub edib.