Samirdən Azərbaycan etirafı: “Əvvəllər bu ölkə barədə məlumatım yox idi”

“Şəki”dən ayrılan sabiq kapitan Samir Styuart Azərbaycan və yerli çempionatla bağlı təəssüratlarını bölüşüb.

Sport1.az xəbər verir ki, amerikalı basketbolçu ABL Liqasındakı çıxışı, ölkəmizdəki həyatı və əvvəlki legioner təcrübəsi ilə müqayisə barədə fikirlərini açıqlayıb.

Styuart əvvəlcə Azərbaycanla bağlı ilkin düşüncələrinə toxunub:

“İlk olaraq qeyd etmək istərdim ki, əvvəllər Azərbaycan adlı ölkə haqqında məlumatım yox idi. Lakin sonradan gördüm ki, Bakı şəhəri olduqca gözəl və müasir bir şəhərdir və ABŞ-də yerləşən Çikaqo şəhərini xatırladır”.

ABL haqqında danışan sabiq kapitan turniri rəqabətli hesab etdiyini bildirib:

“Bu liqada mübarizəni davam etdirə bilmədiyim üçün təəssüf hissi keçirirəm. Liqada yüksək büdcəyə malik, həm legionerlərdən, həm də yerli oyunçulardan ibarət güclü heyətlərə sahib komandalar var idi. “Sabah” və “Abşeron Layns” kimi klublar buna nümunədir”.

“Şəki”dəki dövrünü xüsusi vurğulayan basketbolçu komanda daxilində münasibətlərin müsbət olduğunu qeyd edib:

“Şəki”də çıxış etmək isə mənim üçün böyük məmnuniyyət idi. Digər komandalarla müqayisədə məşqçi heyətinin sayının az olması müəyyən çətinliklər yaratsa da, baş məşqçi ilə basketbol mövzusunda çoxlu müzakirələr apardıq və bu, aramızda peşəkar və səmimi münasibətin formalaşmasına səbəb oldu. Eyni zamanda komanda yoldaşlarımla da yaxşı əlaqələr quruldu”.

Zədə səbəbindən mövsümü erkən başa vurmasına da toxunan Styuart bunları deyib:

“Təəssüf ki, mövsümün zədəyə görə bu şəkildə başa çatması arzuolunan olmadı. Bununla belə, mənə göstərilən etimada və yaradılan imkana görə ABL Liqasına və kluba təşəkkürümü bildirirəm”.

Polşa və Bosniya və Herseqovina çempionatları ilə müqayisə aparan oyunçu uyğunlaşmanın çətin olmadığını vurğulayıb:

“Azərbaycanda oynamaq mənim üçün çətin olmadı. Ən böyük çətinlik ABŞ-də yaşayan yaxınlarımla vaxt fərqinin 9–10 saat təşkil etməsi səbəbindən ünsiyyət qurmaq idi.

Basketbola gəldikdə isə, rəqabət səviyyəsi, komanda yoldaşları fərqli ola, şəhər və ya ölkə dəyişə bilər. Lakin basketbolun özü dəyişmir. Basketbol hər yerdə eyni qaydalarla oynanılır. Bu baxımdan, uyğunlaşma prosesi mənim üçün nisbətən asan oldu”.