Yeni il gecəsi faciəsi: Məşhur klubun futbolçusu yanıq xəsarətləri aldı
Fransanın “Metz” klubunun 19 yaşlı futbolçusu Tahiris Dos Santos İsveçrədə baş verən yanğın zamanı xəsarət alıb.
Sport1.az xəbər verir ki, hadisə Yeni il gecəsi bu ölkənin məşhur Krans-Montana dağ-xizək kurortunda qeydə alınıb. Klub tərəfindən verilən məlumata görə, gənc yarımmüdafiəçinin səhhəti stabildir və həyatı üçün təhlükə yoxdur.
Yanıq xəsarətləri alan Dos Santos təcili tibbi yardım təyyarəsi ilə İsveçrədən Almaniyaya aparılıb və hazırda orada müalicə olunur.
Qeyd edək ki, yanğın kurort ərazisində yerləşən barlardan birində baş verib. Yerli polis orqanlarının məlumatına əsasən, hadisə nəticəsində onlarla insan həlak olub, yüzdən artıq şəxs isə ağır xəsarətlər alıb. İlkin ehtimallara görə, yanğına taxta tavanın yaxınlığında yandırılan fişəng səbəb olub.
