Premyer Liqa təmsilçilərinin futbolçuları Afrika Millətlər Kubokunda qələbə qazandı
“Sumqayıt”ın müdafiəçisi Abdul Raşid Mumini və “Neftçi”nin yarımmüdafiəçisi Sessi D’Almeydanın formasını geyindiyi Benin millisi Afrika Millətlər Kubokunda növbəti matçına çıxıb.
Sport1.az xəbər verir ki, qrup mərhələsinin ikinci turunda D qrupunda mübarizə aparan kollektiv Botsvana seçməsi ilə üz-üzə gəlib. Qarşılaşma Benin yığmasının minimal hesablı – 1:0 qələbəsi ilə yekunlaşıb. Görüşdə vurulan yeganə qol 28-ci dəqiqədə Yoan Roşun aktivinə yazılıb.
“Neftçi”nin üzvü Sessi D’Almeyda matça start heyətində başlayıb və 54-cü dəqiqədə Samadu Attidjikou ilə əvəzlənib. “Sumqayıt”ın futbolçusu Abdul Raşid Mumini isə bu görüşü ehtiyat oyunçular skamyasından izləyib.
Bu nəticədən sonra Afrika yığması D qrupunda 3 xalla üçüncü pilləyə yüksəlib. Botsvana isə hələlik xal toplaya bilməyib və sonuncu sırada qərarlaşıb.
