“Arsenal” titul yolunda böyük üstünlük aldı — rəqiblərin şansı kəskin aşağı düşüb
“Arsenal”ın 2025/26 mövsümündə Premyer Liqa çempionu olma ehtimalı yüksək qiymətləndirilib.
Sport1.az xəbər verir ki, “Opta” superkompüteri Mikel Artetanın komandasına 76,1 faiz çempionluq şansı verir. London təmsilçisi 12 turdan sonra 29 xalla turnir cədvəlinin lideridir. Ardınca 23 xalla “Çelsi”, 22 xalla “Mançester Siti” gəlir.
Modelə əsasən, “şəhərlilər”in titul qazanma ehtimalı cəmi 14,1 faizdir ki, bu da londonlulara nisbətən beş dəfə az deməkdir. Digər komandaların şansı isə minimal göstərilir: “Çelsi” – 3,46 faiz, “Liverpul” – 2,42 faiz, “Aston Villa” – 1,57 faiz, “Kristal Palas” – 1,17 faiz. Qalan klubların çempionluq ehtimalı 1 faizdən aşağıdır.
“Opta” həmçinin düşmə ehtimallarını da açıqlayıb. Modelə görə, Premyer Liqanı tərk etməyə ən real namizəd “Vulverhempton”dır – 94,9 faiz. “Börnli” və “Lids”in Çempionşipə düşmə ehtimalları da yüksəkdir — müvafiq olaraq 61,2 və 61,1 faiz.
