"Bu da bir tarixdir" - İlk dəfə uduzan komandanın baş məşqçisi

II Liqada 5-ci turun oyunları keçirildi.

Sport1.az xəbər verir ki, turun mərkəzi oyunu Lökbatan da baş tutdu. Burda "Qaradağ Lökbatan" çempionatın lideri "Xankəndi"ni qəbul edirdi. Qarşılaşma qəsəbə təmsilçisinin qələbəsi ilə başa çatdı - 2:0.

Qarabağ təmsilçisinin baş məşqçisi İbrahim Uzunca saytımıza açıqlamasında məğlubiyyəti belə şərh etdi:

"Həftələr əvvəl demişdim ki, çempionatda ən çətin və bizə başağrısı olacaq komanda "Qaradağ Lökbatan"dır. Çox gərgin oyun alındı. Heyətimizdə zədəli, cəzalı oyunçular olsa da, əlimizdən gələnin ən yaxşısı etməyə çalışdıq. Hər iki tərəf meydanda yaxşı mübarizə apardı. İlk qolu mövqe səhvimizdən, ikincini isə əks hücumdan buraxdıq. Rəqibi qələbə münasibəti ilə təbrik edirəm".

Türkiyəli mütəxəssis "Xankəndi"nin tarixindəki ilk məğlubiyyəti bağlı bunları söylədi:

"1 il 6 ay öncə yaranan komandayıq. Bu vaxta kimi məğlubiyyət dadmadan irəliləmişik. "Qaradağ Lökbatan"la oyunda məğlub olmaq da qismətimizdə varmış. Bu "Xankəndi"nin tarixində ilk yenilgisidir. Amma məyus olmamalıyıq. Bu da bir tarixdir. Düşünürəm ki, məğlubiyyətdən dərs çıxacağıq. Qarşıdakı matçlarda daha yaxşı performans sərgiləyəcəyik".

MİRZƏ S.