Fransalı futbolçu Azərbaycan klubundan illik 250 min dollar tələb edir - ÖZƏL

Şarl Boli karyerasını Azərbaycanda davam etdirə bilər.

Sport1.az xəbər verir ki, "Apollon"un üzvü ilə Premyer Liqa təmsilçilərindən biri yaxından maraqlanır.

Söhbət "Araz-Naxçıvan"dan gedir. Naxçıvan klubu oyunçunun agentləri ilə danışıqlara başlayıb. Fransalı "boz qurdlar"ın rəhbərliyindən illik 250 min dollar maaş tələb edir.

Maraq üçün bildirək ki, sol cinah vingerinin "Apollon"la 2026-cı ilə qədər sazişi var. Lakin oyunçunun müqaviləsində maraqlı şərt qeyd olunub. Şarl "Apollon" UEFA turnirlərinə vəsiqə qazanmasa, avrokuboklarda iştirak edən hansısa klub onunla maraqlansa, sərbəst qala bilər. "Araz-Naxçıvan" rəhbərliyi də məhz bundan yararlananaq 26 yaşlı futbolçunu heyətinə qatmaq istəyir.

Qeyd edək ki, Şarl Boli ötən mövsüm meydana çıxdığı 23 matçda 1 qol vurub, 1 məhsuldar ötürmə edib.

"Lans"ın yetirməsi olan vinger karyerası ərzində "Paris", "Viçentsa" və "Po" kimi klublarda top qovub. Şarl meydana çıxdığı 186 matçda 17 qol vurub, 15 məhsuldar ötürmə edib.