"Dinamo" Azərbaycan futbolunun əsas probleminin həlli üçün AFFA-ya müraciət edib - AÇIQLAMA

II Liqada mübarizə aparan “Dinamo” 2024/25 mövsümünü 6-cı pillədə tamamladı.

Görəsən, komandanın növbəti ildəki məqsədi nə olacaq?

Bakı təmsilçisi gənc futbolçuların əsgərlik xidmətini “Dinamo”da futbol oynayaraq keçirilməsini istəyir. Bu məsələ həllini nə vaxt tapacaq? Bu sualları aydınlaşdırmaq üçün klubun prezidenti Yaşar Seyidova müraciət etdik.

Bakı təmsilçisinin rəsmisi məsələ ilə bağlı Sport1.az-a açıqlamasında bunları söylədi:

“Ötən mövsümlə müqayisədə bu il daha yaxşı döyüşdük və finişi 6-cı pillədə tamamladıq. Mükafatçılar sırasına düşə bilməməyimizin səbəbi heyətimizin gənc, təcrübəsiz oyunçulardan formalaşması idi. Əsasən Bakının və İsgəndər Cavadov adına Futbol Akademiyasının yetirmələri ilə yola çıxmışdıq. Amma gələn mövsümdən təcrübəli futbolçularla güclənməklə II Liqada çempion olmaq istəyirik.

Digər məsələyə gəlincə, U-21 və U-19 seçmələrimizin üzvlərinin klubumuzda çıxış edərək hərbi xidmət çəkmələri üçün AFFA-ya müraciət etmişik. Komandamız Daxili İşlər Nazirliyinə bağlı olduğundan onların bu işə narazılığı yoxdur. Amma başlıca problem həmin futbolçuların qidalanması, qalacaq yerləri ilə bağlı maddi texniki təminatımızın olmamasıdır. Ona görə AFFA-ya müraciət edərək bu məsələ ilə bağlı onlardan kömək istədiyimizi bildirmişik”.

MİRZƏ S