AFFA-nın Ruslan Qurbanovun pasportunu əlindən almaq hüququ var? - EKSPERT RƏYİ

Bir neçə gün öncə Ruslan Qurbanov saytımıza müsahibə vermişdi.

Millimizin sabiq üzvünün AFFA ilə bağlı qalmaqallı açıqlaması rezonans doğurdu. Sən demə, dağıstanlı Azərbaycan pasportundan məhrum edilib. "Hypers Quba" sıralarında olmayacaq. Çünki II Liqada ancaq yerli futbolçuların çıxışına icazə verilir. Görəsən, uzun illər yığmamızın şərəfini qoruyan birini vətəndaşlıqdan məhrum etmək nə dərəcədə doğrudur? Ölkə qanunvericiliyi bu barədə nə deyir?

Suallarımızı hüquqşünas Elcan Həsənliyə ünvanladıq. Tanınmış vəkil məsələ ilə bağlı Sport1.az-a açıqlamasında bunları söylədi:

"Tək futbolumuzda deyil, digər idman sahələrində də bu cür xoşa gəlməz hallar var. İdmançılara Azərbaycan pasportu və vətəndaşlığı müvəqqəti verilir, yəni 3-5 illik. İstər Ruslan Qurbanovu, istərsə də digər milliləşdirilən idmançıları araşdırsaq, onlarda şəxsiyyət vəsiqəsinin olmadığını görmüş olarıq. Belə olduqda onlar müddət bitdikdən sonra xarici pasportlarını yeniləyə bilmirlər, hətta təhvil verməli olurlar. Təbii ki, hüquqi cəhətdən bu, düzgün prosses deyil. Azərbaycan Respublikasının vətəndaşlığı qanunvericilikdə göstərilən bəlli səbəblərə görə itirilə bilər. Bu səbəblər baş vermədiyi müddətdə heç kəs nə vətəndaşlıqdan, nə də pasportdan məhrum edilə bilməz".

MİRZƏ S.