Karyerasını bitirən Vüqar Mustafayev nə işlə məşğul olacaq? - ÖZÜ AÇIQLADI

“Sumqayıt”ın kapitanı Vüqar Mustafayev Sport1.az-a müsahibəsi...

- Həm özün, həm də komandan üçün mövsümü necə xarakterizə edərdin?
- Bu il mübarizəyə Konfrans Liqasından başladıq. Məqsədimiz yaxşı mübarizə aparıb, mərhələ keçmək idi. Amma istəyimizi reallaşdıra bilmədik. Ona görə də bütün fikrimizi çempionata fokusladıq ki, ötən mövsümdəki uğurumuzu təkrarlayaraq yuxarı pillələrdə qərarlaşaq. Mübarizəyə yaxşı başlasaq da, ardını gətirə bilmədik və müəyyən qədər eniş yaşadıq. Amma əsas odur ki, komandanın Premyer Liqada qalmasını təmin etdik. Növbəti mövsümdə “Sumqayıt”ın daha yaxşı çıxış edəcəyinə inanır və kollektivə uğurlar arzu edirəm. Özümə gəlincə, aldığım zədələrə və onların nəticəsindəki ağrılara görə kənarda qaldım. Nə qədər bərpa prossesi keçsəm də, ağrılarım səngimədi. Belə olduqda karyeramı yekunlaşdırmaq qərarına gəldim.

- Karyeranı sonlandırmaqla bağlı verdiyin qərar erkən olmadı?
- Düzdür. Lakin zədə və ağrılarıma görə məcbur idim. Sağlamlığım imkan versəydi, hələ karyeramı uzun illər davam etdirəcəkdim.

- Bundan sonra nə işlə məşğul olacan?
- Məşğuliyyətim yenə futbol ilə bağlı olacaq. Məşqçilik kurslarına qoşulacam. Millidə oynadığım üçün C kateqoriyam var. Buna baxmayaraq, özümü daha da təkmilləşdirməliyəm.

MİRZƏ S