Cüdo üzrə Dünya Çempionatı: Bakıya gələcək idmançıların sayı açıqlanıb

Bakıda böyüklər arasında keçiriləcək cüdo üzrə Dünya Çempionatında iştirak edəcək ölkə və idmançıların sayı açıqlanıb.

Sport1.az xəbər verir ki, oktyabrın 4-dən 10-nə qədər davam edəcək turnirdə beş qitəni təmsil edən 83 ölkədən ümumilikdə 531 cüdoçunun iştirakı nəzərdə tutulub.

Onlardan 277-si kişi, 254-ü qadın idmançıdır. Avropa Cüdo İttifaqına daxil olan ölkələr çempionatda 254, Asiya Cüdo İttifaqının üzvləri isə 154 idmançı ilə təmsil olunacaq. Panamerika Cüdo Konfederasiyasından 77, Afrika Cüdo İttifaqından 34, Okeaniyadan isə 12 cüdoçu Bakıya gələcək.

Dünya çempionatında kişilər arasında 60, 66, 73, 81, 90, 100 və +100 kq, qadınlarda isə 48, 52, 57, 63, 70, 78 və +78 kq çəki dərəcələrində qaliblər müəyyənləşəcək.

Yarışın ilk günündə kişilərin 60 kq və qadınların 48 kq, sonuncu günündə isə müvafiq olaraq +100 kq və +78 kq çəki dərəcələrində mübarizə aparılacaq.

Milli Gimnastika Arenasında təşkil olunacaq mundialın yarış proqramı yeddi gün nəzərdə tutulub.