İngiltərə futbolçularına yuxu dərmanı veriləcək

İngiltərə millisində futbolçuların dünya çempionatının növbəti oyunundan əvvəl tam yuxu alması üçün gücləndirilmiş tədbirlər görülür.

Sport1.az xəbər verir ki, bu barədə BBC məlumat yayıb.

Bildirilir ki, İngiltərə millisində komandanın qalacağı oteli gizli saxlamaq istəyirlər, lakin bu məlumatın sosial şəbəkələrə sızacağından qorxurlar. Bundan əlavə, özləri ilə qulaq tıxacı və ya yuxu maskası kimi şəxsi yuxu ləvazimatları gətirməyən futbolçulara və milli komandanın əməkdaşlarına təbii yuxu dərmanları və ya ağ küy generatorları təklif olunacaq.

Turnirin 1/8 finalında Tomas Tuxelin komandası Meksika millisi ilə qarşılaşacaq. Oyun iyulun 6-da Mexikodakı "Atsteka" stadionunda baş tutacaq.

Bundan əvvəl meksikalı azarkeşlər dünya çempionatının 1/16 final oyunundan əvvəlki gecə otelin qarşısında atəşfəşanlıq edərək Ekvador millisinin futbolçularının yatmasına mane olmuşdular. Oyun günü Meksika yığması 2:0 hesabı ilə qələbə qazanmışdı.

Qeyd edək ki, dünya çempionatı 2026 iyunun 11-dən iyulun 19-dək ABŞ, Meksika və Kanadada keçirilir. Turnirin formatının dəyişməsi səbəbindən tarixdə ilk dəfə olaraq rəsmi mərhələyə 48 komanda vəsiqə qazanıb.