Bu futbolçu "Qarabağ"la müqavilə imzalamaq üçün Azərbaycana gəldi
“Qarabağ” növbəti transferini reallaşdırmağa hazırlaşır.
Sport1.az Kiprin kerkida.net portalına istinadən xəbər verir ki, 26 yaşlı qambiyalı hücumçu Zakaria Savo transfer prosesini yekunlaşdırmaq məqsədilə Azərbaycana gəlib.
Mənbənin yazdığına görə, futbolçu Bakıda tibbi baxışdan keçdikdən sonra Ağdam təmsilçisi ilə rəsmi müqaviləyə imza atacaq.
Bir neçə gündür “Qarabağ”ın Zakaria Savo ilə maraqlandığı barədə xəbərlər yayılırdı. Hazırda tərəflər arasında danışıqların son mərhələyə çatdığı bildirilir.
Qambiyalı forvard son aylarda Kiprin AEL komandasında göstərdiyi performansla diqqət mərkəzinə düşüb. O, 22 matçda 10 dəfə fərqlənərək bir sıra klubların maraq dairəsinə daxil olub. Buna baxmayaraq, futbolçunun karyerasını Azərbaycanda davam etdirməyə yaxın olduğu qeyd olunur.
Zakaria Savo hazırda müqavilə əsasında “Yurqorden” klubuna məxsusdur. Hücumçu daha əvvəl “BK Olimpik”, “Oskarshamns” və “Start” komandalarının da formasını geyinib.
Qeyd edək ki, “Qarabağ” mayın 18-də fransalı cinah oyunçusu Jali Muaddibin transferini rəsmən açıqlamışdı.
