Seneqal hökumətindən CAF-a korrupsiya ittihamı

Seneqal hökuməti Afrika Futbol Konfederasiyasının qərarına sərt reaksiya verib.

Sport1.az xəbər verir ki, rəsmi Dakar Afrika Millətlər Kuboku ilə bağlı qəbul olunan qərardan narazı qaldığını bildirib və qurum rəhbərliyində korrupsiya ehtimalının araşdırılmasını tələb edib.

Seneqal hökumətinin açıqlamasında bildirilib ki, apellyasiya komitəsinin qərarı ölkə yığmasını qazandığı tituldən məhrum edərək onu Mərakeşə verməklə idman ədalətinə ziddir. Rəsmi qurum bu addımın idman etikasının əsas prinsipləri olan ədalət, dürüstlük və meydanda qazanılan nəticəyə hörmət anlayışlarına zərbə vurduğunu vurğulayıb.

Açıqlamada həmçinin qeyd olunub ki, bu qərar qaydaların yanlış şərhi nəticəsində qəbul edilib və Afrika futbolunun nüfuzuna ciddi zərər vurur. Seneqal tərəfi məsələ ilə bağlı müstəqil beynəlxalq araşdırmanın aparılmasına çağırıb.

Qeyd olunub ki, ölkə yığmanın titulunun geri qaytarılması üçün bütün hüquqi vasitələrdən istifadə edəcək və beynəlxalq məhkəmə instansiyalarına müraciət etməyə hazırdır.

Xatırladaq ki, Afrika Futbol Konfederasiyası Mərakeş tərəfinin apellyasiyasını təmin edərək final görüşündə Seneqal yığmasına 0:3 hesablı texniki məğlubiyyət verib. Bu qərar matçın son dəqiqələrində təyin olunan penalti epizodundan sonra komandanın meydanı tərk etməsi ilə əlaqələndirilib.