Finalissima keçirilməyəcək – RƏSMİ
UEFA Finalissima-2026 oyununun keçirilməyəcəyini açıqlayıb.
Sport1.az xəbər verir ki, bu barədə qurumun yaydığı bəyanatda bildirilib.
Qərara səbəb tərəflərin qarşılaşmanın tarixi və keçiriləcəyi məkanla bağlı razılığa gələ bilməməsi olub. Argentina və İspaniya milli komandaları arasında nəzərdə tutulan matç Qətərdə keçirilməli idi. Lakin Yaxın Şərqdə hərbi gərginliyin artması səbəbindən bu variantdan imtina edilib.
UEFA-nın məlumatına görə, Argentina yığması matçın Madriin “Santiyaqo Bernabeu” stadionunda keçirilməsi təklifini qəbul etməyib. Həmçinin Madrid və Buenos Ayresdə iki oyundan ibarət qarşılaşma variantı da razılaşdırılmayıb. Martın 27 və ya 30-da Avropada başqa stadionda oyun keçirmək ideyası da nəticə verməyib.
Argentina tərəfi görüşün 2026 dünya çempionatında sonra keçirilməsini təklif etsə də, bu plan da təsdiqlənməyib.
Qeyd edək ki, Avropa çempionu ilə Amerika Kubokunun qalibini qarşılaşdıran Finalissima ilk dəfə 2022-ci ildə təşkil olunmuşdu. Həmin oyunda Argentina millisi İtaliya üzərində 3:0 hesablı qələbə qazanmışdı.
