"Finalissima" matçı "Real"ın stadionunda keçiriləcək?
Avropa çempionu İspaniya ilə Cənubi Amerika Kubokunun qalibi Argentina arasında keçiriləcək “Finalissima-2026” matçının harada oynanılacağı hələ müəyyənləşməyib.
Sport1.az xəbər verir ki, jurnalist Qaston Edulun yaydığı məlumata görə, Argentina Futbol Assosiasiyası qarşılaşmanın Madriddə keçirilməsi ideyasına müsbət yanaşmayıb.
Məlumata əsasən, oyunun “Santyaqo Bernabeu” stadionunda təşkil olunması təklif edilsə də, Argentina tərəfi buna razılıq verməyib. Onların fikrincə, matçın İspaniya ərazisində keçirilməsi rəqib üçün meydan üstünlüyü yarada bilər.
Bu səbəbdən digər şəhərlərin variantları müzakirə olunur. Alternativ məkanlar arasında Lissabondakı “Estadio da Luz”, eləcə də Roma və Milan şəhərləri göstərilir.
Qeyd edək ki, UEFA və KONMEBOL-un birgə təşkil etdiyi “Finalissima” görüşünün martın 27-də keçirilməsi planlaşdırılır.
