“Qarabağ” oyununun sədası : Runi xəbərdarlıq etdi, cavab alındı

İngiltərə millisinin sabiq hücumçusu Ueyn Runi “Çelsi”nin baş məşqçisi Enso Mareskanı “Qarabağ”la keçirilən Çempionlar Liqasının oyunundakı (2:2) rotasiya qərarına görə tənqid edib.

Sport1.az xəbər verir ki, Runi “The Wayne Rooney Show” proqramında məsələ ilə bağlı deyib:
“Futbolçular oynamaq və meydanda bir-birlərini daha yaxşı anlamaq istəyirlər. Əgər sən daim heyəti dəyişirsənsə, oyunçular bundan narazı qalacaq. Məncə, bu, gec-tez öz mənfi nəticəsini göstərəcək. Əgər komanda daim qalib gəlirsə, buna heç kim irad tutmaz. Amma nəticə yoxdursa, suallar verilməlidir”.

Runi bu fikirləri səsləndirdikdən sonra Enso Mareska onun tənqidlərinə cavab verib. “Mirror”a danışan italiyalı mütəxəssis bildirib:
“Dəfələrlə demişəm ki, elə bir dövrdə yaşayırıq ki, hər kəs istədiyini deyə bilər. Buna hörmətlə yanaşıram, amma “Qarabağ”la oyundan sonra da demişdim – mən kluba gəldiyim gündən futbolçular arasında rotasiyanın vacibliyini düşünürəm və bu, nəticəyə təsir etməyib”.

Mareska gənc futbolçulara meydanda daha çox şans verilməsinin vacibliyini də vurğulayıb:
“Fikrimcə, əgər heyətdə rotasiyada iştirak edənlər Braziliya millisinin üzvü Andre Santos, Niderland yığmasının oyunçusu Yorrel Hato və yenə Braziliya millisindən Estavao kimilərdirsə, burada problem rotasiyada deyil. Onlar istedadlı, gənc və keyfiyyətli futbolçulardır. Əlbəttə, gənclərə səhv etmək imkanı vermək lazımdır ki, daha yaxşı oyunçuya çevrilsinlər”.