"Qarabağ" sabiq hücumçusunu geri gətirir - İDDİA

"Flamenqo" klubunun hücumçusu Juninyo Olavionun "Qarabağ"a mümkün dönüşü yenidən gündəmə gəlib.

Sport1.az Azərbaycan təmsilçisinin 28 yaşlı braziliyalı forvardla danışıqları yenidən başladığı bildirilir. "Qarabağ"ın UEFA Çempionlar Liqasının qrup mərhələsinə yüksəlməsi, həmçinin Juninyonun "Flamenqo"da əsas heyətə düşməkdə çətinlik çəkməsi bu keçidin reallaşma ehtimalını artırır.

Braziliya klubunun baş məşqçisi Filipe Luis son açıqlamasında heyətdən razı olduğunu, lakin bəzi oyunçuların komandanı tərk edə biləcəyini qeyd edib. Məlumatlara görə, bu siyahıda ilk sırada Juninyo yer alır.

2024-cü ilin yanvarında 5 milyon avroya "Qarabağ"dan ayrılan hücumçu keçmiş klubuna qayıtmaq istəyindədir. "Qarabağ" isə onu birillik icarəyə götürmək niyyətindədir. Digər tərəfdən, "Flamenqo" oyunçunu tam şəkildə transfer etmək istəyir. Hazırda maliyyə məsələləri ilə bağlı danışıqlar davam etdirilir və Juninyonun geri dönmək arzusu bu prosesə təsir edə bilər.

Sport1.az